கோவையில் இலவச மராத்தான் போட்டி அறிவிப்பு – ₹1 லட்சம் மதிப்பிலான பரிசுகள் வெல்ல வாய்ப்பு
கோவை மாவட்ட காவல்துறை, போதைப்பொருள் இல்லா கோவை இயக்கத்தின் கீழ் 'ஒரு முடிவின் தொடக்கம்' என்ற பெயரில் ஆகஸ்ட் 8 அன்று இலவச மராத்தான் போட்டியை நடத்துகிறது. பங்கேற்பாளர்களுக்கு சான்றிதழ் மற்றும் ₹1 லட்சம் மதிப்பிலான பரிசுகளை வெல்லும் வாய்ப்பும் உள்ளது.
Prasanth Subramani 
கோவை மாவட்ட காவல்துறை, "Mission Drug-Free Coimbatore" (போதைப்பொருள் இல்லா கோவை) என்ற சமூக விழிப்புணர்வு இயக்கத்தின் ஒரு பகுதியாக, "ஒரு முடிவின் தொடக்கம்" என்ற தலைப்பில் இலவச மராத்தான் போட்டியை அறிவித்துள்ளது.
இந்த மராத்தான் போட்டி ஆகஸ்ட் 8 ஆம் தேதி அதிகாலை 5.00 மணிக்கு நடைபெறவுள்ளது. அனைத்து வயதினரும் பங்கேற்கும் வகையில் 5 கிலோமீட்டர் (5K) ஓட்டப்பந்தயமும், 10 வயதுக்குட்பட்ட குழந்தைகளுக்காக சிறப்பு 2 கிலோமீட்டர் (2K) ஓட்டப்பந்தயமும் நடத்தப்பட உள்ளது.
போட்டியில் பங்கேற்று நிறைவு செய்யும் அனைவருக்கும் பங்கேற்புச் சான்றிதழ் (Participation Certificate) வழங்கப்படும். மேலும், பங்கேற்பாளர்களுக்கு மொத்தம் ₹1 லட்சம் மதிப்பிலான பரிசுகளை வெல்லும் வாய்ப்பும் வழங்கப்பட்டுள்ளது.
இந்த மராத்தானில் பங்கேற்பதற்கு எந்தவித பதிவுக் கட்டணமும் இல்லை. பதிவு முற்றிலும் இலவசம் என்பதால், பொதுமக்கள், மாணவர்கள், இளைஞர்கள், குடும்பத்தினருடன் இணைந்து ஆர்வமுடன் பங்கேற்க கோவை மாவட்ட காவல்துறை அழைப்பு விடுத்துள்ளது.
போதைப்பொருள் பயன்பாட்டுக்கு எதிராக சமூகத்தில் விழிப்புணர்வை ஏற்படுத்தி, ஆரோக்கியமான வாழ்க்கை முறையை ஊக்குவிக்கும் நோக்கில் இந்த மராத்தான் போட்டி நடத்தப்படுகிறது. உடல்நலம், ஒற்றுமை மற்றும் சமூகப் பொறுப்புணர்வை வலியுறுத்தும் இந்த நிகழ்வு, கோவையில் பெரும் வரவேற்பைப் பெறும் என எதிர்பார்க்கப்படுகிறது.
