அதிமுகவில் உட்கட்சி பூகம்பம்? – எடப்பாடிக்கு 17 எம்எல்ஏக்கள் மட்டும் ஆதரவு!

தமிழக சட்டப்பேரவையில் அதிமுக எம்எல்ஏக்கள் குழுத் தலைவராக அக்கட்சியின் பொதுச்செயலாளர் Edappadi K. Palaniswami-யை தேர்ந்தெடுக்க 17 எம்எல்ஏக்கள் மட்டுமே ஆதரவு தெரிவித்து, தமிழக சட்டப்பேரவையின் தற்காலிக தலைவராக நியமிக்கப்பட்டுள்ள கருப்பையாவிடமும் பேரவைச் செயலரிடமும் இன்று (மே 11) கடிதம் வழங்கியுள்ளனர்.

நடந்து முடிந்த சட்டப்பேரவைத் தேர்தலில் வெற்றி பெற்று எம்எல்ஏவாகத் தேர்வான உறுப்பினர்களின் பதவியேற்பு விழா திங்கள்கிழமை காலை நடைபெற்றது. அதிமுகவில் C. V. Shanmugam தவிர மற்ற அனைத்து உறுப்பினர்களும் இன்று பதவியேற்றனர்.

இந்த நிலையில், அதிமுக சட்டப்பேரவை குழுத் தலைவராக எடப்பாடி பழனிசாமியைத் தேர்வு செய்ய தளவாய் சுந்தரம், ஓ.எஸ்.மணியன், அக்ரி கிருஷ்ணமூர்த்தி, மரகதம் குமாரவேல் உள்ளிட்ட 17 எம்எல்ஏக்கள் மட்டுமே ஆதரவு அளித்துள்ளதாக தகவல்கள் வெளியாகியுள்ளன.

ஆனால், மொத்தமுள்ள 47 அதிமுக எம்எல்ஏக்களில் 36 பேர் S. P. Velumani-யை சட்டப்பேரவை குழுத் தலைவராக தேர்வு செய்ய ஆதரவு தெரிவித்துள்ளதாக தகவலறிந்த வட்டாரங்கள் கூறுகின்றன.

மேலும், எஸ்.பி.வேலுமணியை சட்டப்பேரவை குழுத் தலைவராகவும், சி.வி.சண்முகத்தை துணைத் தலைவராகவும் தேர்வு செய்ய ஆதரவளித்து எம்எல்ஏக்கள் கையொப்பமிட்டுள்ளதாகவும் கூறப்படுகிறது.

இதன் மூலம் அதிமுகவில் பெரும்பான்மை எம்எல்ஏக்கள் எடப்பாடி பழனிசாமிக்கு எதிராக இருப்பது வெளிப்படையாகியுள்ளது. இதனிடையே, எஸ்.பி.வேலுமணி, ஆர்.காமராஜ், சி.விஜயபாஸ்கர், நெய்வேலி ராஜேந்திரன் உள்ளிட்ட அதிமுக முக்கிய நிர்வாகிகளுடன் சி.வி.சண்முகம் அவசர ஆலோசனை நடத்தவுள்ளதாக தகவல்கள் வெளியாகியுள்ளன.

இந்த சம்பவம் அதிமுகவில் புதிய அரசியல் பரபரப்பை ஏற்படுத்தியுள்ள நிலையில், கட்சியின் அடுத்தகட்ட நிலைப்பாடு குறித்து அரசியல் வட்டாரங்களில் தீவிர கவனம் நிலவுகிறது.