சதுரகிரி சுந்தர மகாலிங்கம் கோயிலுக்கு நாள்தோறும் மலையேற தடை: ஜூன் 22 முதல் அமல்

பிரசித்தி பெற்ற சதுரகிரி சுந்தர மகாலிங்கம் திருக்கோயிலுக்கு பக்தர்கள் நாள்தோறும் மலையேறி சாமி தரிசனம் செய்வதற்கு ஜூன் 22 முதல் தடை விதிக்கப்பட்டுள்ளது. உயர்நீதிமன்ற உத்தரவின் அடிப்படையில் இந்த நடவடிக்கை மேற்கொள்ளப்பட்டுள்ளதாக அதிகாரிகள் தெரிவித்துள்ளனர்.

விருதுநகர் மாவட்டம் ஸ்ரீவில்லிப்புத்தூர் - மேகமலை புலிகள் காப்பகத்தின் சாப்டூர் வனச்சரகத்தில் அமைந்துள்ள சதுரகிரி சுந்தர மகாலிங்கம் கோயில், தமிழ்நாட்டின் முக்கிய ஆன்மிகத் தலங்களில் ஒன்றாக விளங்கி வருகிறது. ஆண்டுதோறும் ஆயிரக்கணக்கான பக்தர்கள் மலையேறிச் சென்று சுவாமி தரிசனம் செய்து வருகின்றனர்.

2015ஆம் ஆண்டு ஏற்பட்ட கடும் வெள்ளப்பெருக்கிற்கு பிறகு, பக்தர்களின் பாதுகாப்பை கருத்தில் கொண்டு அமாவாசை, பௌர்ணமி மற்றும் பிரதோஷம் உள்ளிட்ட மாதத்தில் எட்டு நாட்களுக்கு மட்டுமே பக்தர்கள் மலையேற அனுமதிக்கப்பட்டு வந்தனர்.

இதையடுத்து, கடந்த ஆண்டு ஏப்ரல் மாதம் முதல் வத்திராயிருப்பு மற்றும் மேற்குத் தொடர்ச்சி மலைப் பகுதிகளில் பெரிய அளவில் மழை பாதிப்பு இல்லாத காரணத்தால், பக்தர்கள் நாள்தோறும் மலையேறி சாமி தரிசனம் செய்ய அனுமதி வழங்கப்பட்டது. மேலும், மழைப்பொழிவு மற்றும் வானிலை நிலவரத்தைப் பொறுத்து அனுமதி வழங்கப்படும் என்றும் தெரிவிக்கப்பட்டிருந்தது.

இந்த நிலையில், உயர்நீதிமன்ற உத்தரவின்படி ஜூன் 22 முதல் பக்தர்கள் தினசரி மலையேறி சாமி தரிசனம் செய்வதற்கு தடை விதிக்கப்பட்டுள்ளது. இனி அமாவாசை, பௌர்ணமி, பிரதோஷம் உள்ளிட்ட குறிப்பிட்ட நாட்களில் மட்டுமே பக்தர்கள் அனுமதிக்கப்பட வாய்ப்புள்ளதாக தகவல் வெளியாகியுள்ளது.

பக்தர்களின் பாதுகாப்பு மற்றும் சுற்றுச்சூழல் பாதுகாப்பை கருத்தில் கொண்டு இந்த முடிவு எடுக்கப்பட்டுள்ளதாக வனத்துறை மற்றும் கோயில் நிர்வாகம் தெரிவித்துள்ளது. சதுரகிரி செல்ல திட்டமிடும் பக்தர்கள், அனுமதி நாட்கள் மற்றும் அதிகாரப்பூர்வ அறிவிப்புகளை கவனித்து பயணம் மேற்கொள்ளுமாறு அறிவுறுத்தப்பட்டுள்ளனர்.