ரூபாய் மதிப்பு மீட்பு: டாலருக்கு எதிராக 61 காசுகள் உயர்வு
அமெரிக்கா–ஈரான் அமைதி ஒப்பந்த சாத்தியம் மற்றும் கச்சா எண்ணெய் விலை சரிவால், இந்திய ரூபாய் மதிப்பு டாலருக்கு எதிராக 61 காசுகள் உயர்ந்தது.
Prasanth Subramani 
அமெரிக்க அதிபர் Donald Trump ஈரானுடன் அமைதி ஒப்பந்தம் குறித்து சூசகமாக தெரிவித்ததைத் தொடர்ந்து, சர்வதேச சந்தையில் பிரென்ட் கச்சா எண்ணெய் விலை குறைந்தது. இதன் தாக்கமாக, இந்திய ரூபாய் மதிப்பு டாலருக்கு எதிராக இன்று 61 காசுகள் உயர்ந்து ரூ.94.57 ஆக முடிவடைந்தது.
வங்கிகளுக்கு இடையேயான அந்நிய செலாவணி சந்தையில், அமெரிக்க டாலருக்கு எதிராக ரூபாய் மதிப்பு இன்று ரூ.95 என்ற அளவில் வர்த்தகத்தை தொடங்கியது.
பின்னர் வர்த்தகத்தின் போது ரூ.95.18 என்ற குறைந்தபட்ச நிலையை எட்டிய ரூபாய், இறுதியில் மீண்டு, முந்தைய நாள் முடிவை விட 61 காசுகள் உயர்ந்து ரூ.94.57 ஆக நிலைபெற்றது.
வளைகுடா பகுதிகளில் ஏற்பட்ட புதிய பதற்றம் மற்றும் ஐக்கிய அரபு அமீரகத்தின் உள்கட்டமைப்புகள் குறிவைக்கப்பட்டதால், உலகளாவிய விநியோகச் சங்கிலி குறித்த அச்சம் அதிகரித்திருந்தது.
இதன் காரணமாக, முதலீட்டாளர்கள் பின்வாங்கிய நிலையில், இந்திய ரிசர்வ் வங்கி தலையீடு செய்யக்கூடும் என்ற எதிர்பார்ப்பு சந்தையில் நிலவியது.
இதற்கு முன், டாலருக்கு எதிராக இந்திய ரூபாய் மதிப்பு ரூ.95.44 என்ற வரலாறு காணாத குறைந்தபட்ச நிலையை எட்டியிருந்தது குறிப்பிடத்தக்கது.
அதேநேரம், பிரென்ட் கச்சா எண்ணெய் விலை பீப்பாய் ஒன்றுக்கு 100 அமெரிக்க டாலர் அளவை நோக்கி குறைந்ததால், இந்திய நாணய சந்தைக்கு ஓரளவு நிம்மதி ஏற்பட்டுள்ளது.
