ஆகஸ்ட் 12-ல் அரிய முழு சூரிய கிரகணம்: இந்தியாவில் தெரியாது; உலகின் சில நாடுகளில் மட்டுமே காட்சியளிக்கும்
ஆகஸ்ட் 12 அன்று அரிய முழு சூரிய கிரகணம் நிகழவுள்ளது. இந்தியாவில் இந்த கிரகணம் தெரியாது. கிரீன்லாந்து, ஐஸ்லாந்து, ஸ்பெயின் உள்ளிட்ட நாடுகளில் மட்டுமே முழுமையாகக் காண முடியும்.
Prasanth Subramani 
விண்ணில் நிகழும் அரிய வானியல் நிகழ்வுகளில் ஒன்றான முழு சூரிய கிரகணம் வரும் ஆகஸ்ட் 12-ம் தேதி (புதன்கிழமை) நிகழவுள்ளது. இந்த அரிய நிகழ்வை உலகம் முழுவதும் உள்ள வானியல் ஆர்வலர்கள், ஆய்வாளர்கள் மற்றும் புகைப்படக் கலைஞர்கள் மிகுந்த எதிர்பார்ப்புடன் காத்திருக்கின்றனர்.
சூரியனுக்கும் பூமிக்கும் இடையில் நிலவு துல்லியமாக வரும்போது, சூரியனின் முழு ஒளியும் மறைக்கப்பட்டு பகல் நேரத்திலேயே வானம் மாலைப்பொழுது போன்ற இருண்ட தோற்றத்தை பெறும். அப்போது சூரியனின் வெளிப்புற வளிமண்டலமான கரோனா மட்டும் வெண்மையான ஒளிவளையமாக தென்படும். இதுவே முழு சூரிய கிரகணத்தின் முக்கிய சிறப்பாகும்.
இந்த முறை நடைபெறும் முழு சூரிய கிரகணம் இந்தியாவின் எந்தப் பகுதியிலும் காண முடியாது. கிரகணத்தின் முழுப் பாதை கிரீன்லாந்து, ஐஸ்லாந்து, ஸ்பெயின் மற்றும் போர்ச்சுகலின் சில பகுதிகள் வழியாகச் செல்லும்.
குறிப்பாக வடக்கு ஸ்பெயினில் சூரியன் மறையும் நேரத்தில் இந்த கிரகணம் நிகழவுள்ளதால், அடிவானத்தில் மறையும் சூரியனுடன் கரோனா ஒளிவளையம் இணைந்து காணப்படும் அபூர்வ காட்சி உலகம் முழுவதும் இருந்து சுற்றுலாப் பயணிகளை ஈர்க்கும் என எதிர்பார்க்கப்படுகிறது.
அதேபோல், ஐஸ்லாந்தின் பனிப்பாறைகள் மற்றும் எரிமலை நிலப்பரப்புகள், கிரீன்லாந்தின் ஆர்க்டிக் பனிப் பகுதிகள் போன்ற இடங்களிலும் இந்த அரிய வானியல் நிகழ்வைக் காண ஆயிரக்கணக்கான சுற்றுலாப் பயணிகள் மற்றும் வானியல் ஆர்வலர்கள் பயணம் மேற்கொண்டு வருகின்றனர்.
வானியல் ஆர்வலர்களுக்கு இது மிகவும் முக்கியமான நிகழ்வாகக் கருதப்படுவதால், உலகின் பல்வேறு நாடுகளில் இந்த முழு சூரிய கிரகணத்தை நேரில் காண சிறப்பு சுற்றுலா மற்றும் அறிவியல் ஆய்வு ஏற்பாடுகளும் செய்யப்பட்டுள்ளன.
