தமிழகத்தில் பைக் டாக்சி சேவைக்கு அனுமதி இல்லை – சட்ட அடிப்படை இல்லையென அரசு விளக்கம்
தமிழகத்தில் தற்போது பைக் டாக்சி சேவைக்கு அனுமதி வழங்க முடியாது என மாநில அரசு தெரிவித்துள்ளது. இதற்கான சட்ட அடிப்படை தற்போது இல்லை என்றும், தேவையான சட்ட விதிமுறைகளை மத்திய அரசு மட்டுமே கொண்டு வர முடியும் என்றும் விளக்கம் அளிக்கப்பட்டுள்ளது.
Prasanth Subramani 
தமிழகத்தில் தற்போது பைக் டாக்சி (Bike Taxi) சேவையை இயக்க அனுமதி வழங்கப்படாது என்று மாநில அரசு தெளிவுபடுத்தியுள்ளது. இதற்கான சட்ட அடிப்படை தற்போது நடைமுறையில் இல்லை என்பதால், பைக் டாக்சி சேவைகளை அனுமதிக்க மாநில அரசுக்கு அதிகாரம் இல்லை என அரசு விளக்கம் அளித்துள்ளது.
பைக் டாக்சி சேவையை மாநிலத்தில் அறிமுகப்படுத்த சில தனியார் நிறுவனங்கள் ஆர்வம் தெரிவித்திருந்தாலும், தற்போதுள்ள சட்ட விதிகளின்படி அவற்றிற்கு அனுமதி வழங்க முடியாது என்று அரசு தெரிவித்துள்ளது. நடைமுறையில் உள்ள விதிமுறைகளின் கீழ் பைக் டாக்சி சேவைகளை சட்டபூர்வமாக அங்கீகரிக்கும் அதிகாரம் மாநில அரசுக்கு இல்லை என்றும் கூறப்பட்டுள்ளது.
மேலும், பைக் டாக்சி சேவையை நாடு முழுவதும் சட்டபூர்வமாக அங்கீகரித்து ஒழுங்குபடுத்த தேவையான சட்டத் திருத்தங்கள் மற்றும் வழிகாட்டுதல்களை கொண்டு வருவது மத்திய அரசின் பொறுப்பாகும் என்று அதிகாரிகள் தெரிவித்துள்ளனர். மத்திய அரசு அதற்கான சட்ட கட்டமைப்பை உருவாக்கும் வரை தமிழகத்தில் பைக் டாக்சி சேவைகள் செயல்பட வாய்ப்பில்லை எனவும் விளக்கப்பட்டுள்ளது.
இதனால், ஆப் வழி போக்குவரத்து சேவைகளை பயன்படுத்தும் பயணிகள் மற்றும் பைக் டாக்சி சேவையை தொடங்க ஆர்வமாக இருந்த நிறுவனங்கள், மத்திய அரசின் அடுத்தகட்ட கொள்கை முடிவுக்காக காத்திருக்க வேண்டிய நிலை ஏற்பட்டுள்ளது.
பைக் டாக்சி சேவை குறித்த சட்டரீதியான தெளிவான நடைமுறைகள் அமலுக்கு வந்த பிறகே, தமிழகத்தில் இந்த சேவையை அறிமுகப்படுத்துவது குறித்து முடிவு எடுக்கப்படும் என மாநில அரசு தெரிவித்துள்ளது.
