திமுக கூட்டணியில் இருந்து விலகிய காங்கிரஸ்: தவெகவுடன் புதிய கூட்டணி உறுதி

தமிழ்நாட்டில் முக்கியமான அரசியல் மாற்றமாக, இந்திய தேசிய காங்கிரஸ், திராவிட முன்னேற்றக் கழகம் கூட்டணியில் இருந்து விலகி, தமிழக வெற்றிக் கழகம் (தவெக) உடன் புதிய கூட்டணியை உருவாக்கியுள்ளது.

தமிழக சட்டப்பேரவைத் தேர்தல் அறிவிக்கப்பட்டது முதல் கூட்டணி தொடர்பான அரசியல் குழப்பங்கள் தொடர்ந்து நிலவி வந்தன. ஆரம்பத்தில் திமுகவுடன் கூட்டணி வைக்க காங்கிரஸ் தேசிய தலைமை தயக்கம் காட்டியதாக கூறப்பட்டது. ஆனால், தமிழக காங்கிரஸ் நிர்வாகிகள் வலியுறுத்தியதன் காரணமாகவே அந்த கூட்டணி உருவானதாக தகவல்கள் வெளியாகின.

அதேநேரத்தில், தவெகவுடனும் கூட்டணி பேச்சுவார்த்தை நடைபெற்று வந்ததாக தமிழக காங்கிரஸ் பொறுப்பாளர் கிரிஷ் சோடங்கர் தொடர்ந்து தெரிவித்து வந்தார். மேலும், காங்கிரஸ் நிர்வாகி பிரவீன் சக்கரவர்த்தி, விஜய்யை சந்தித்ததாகவும் தகவல்கள் வெளியாகின.

இறுதியாக, திமுக கூட்டணியில் காங்கிரஸுக்கு 28 தொகுதிகளும் ஒரு மாநிலங்களவை இடமும் ஒதுக்கப்பட்டது. காங்கிரஸ் சார்பில் கிறிஸ்டோபர் திலக் மாநிலங்களவை உறுப்பினராக தேர்வானார். இந்த கூட்டணியில் ராகுல் காந்திக்கு முழுமையான விருப்பம் இல்லை என்றும், தமிழக காங்கிரஸ் நிர்வாகிகளின் அழுத்தத்தினால் மட்டுமே ஒப்புதல் அளிக்கப்பட்டதாகவும் கூறப்பட்டது.

இந்நிலையில், தேர்தலுக்குப் பிறகு ஆட்சியமைப்பதற்காக காங்கிரஸின் ஆதரவை தமிழக வெற்றிக் கழகம் கோரியிருந்தது. அதனைத் தொடர்ந்து, காங்கிரஸ் தேசிய தலைமை தவெகவுக்கு ஆதரவு அளிக்க ஒப்புக்கொண்டுள்ளது. வருங்கால தேர்தல்களிலும் இந்த கூட்டணி தொடரும் என்றும், அதே நேரத்தில் மதவாத சக்திகளுடன் கூட்டணி அமைக்கக்கூடாது என்ற நிபந்தனையும் விதிக்கப்பட்டுள்ளது.

ஏற்கனவே, கூட்டணியில் இணையும் கட்சிகளுக்கு ஆட்சியிலும் பங்கு வழங்கப்படும் என்று விஜய் தெரிவித்திருந்தார். அதன் அடிப்படையில் தற்போது காங்கிரஸுக்கு ஒரு அமைச்சர் பதவி வழங்கப்படலாம் என்று தகவல்கள் வெளியாகியுள்ளன. குறிப்பாக பெண் ஒருவருக்கு அமைச்சர் பதவி வழங்குவது தொடர்பாக ஆலோசனை நடைபெற்று வருவதாக கூறப்படுகிறது.

இந்த கூட்டணியை உறுதிசெய்யும் நோக்கில், பனையூர் அலுவலகத்தில் விஜய்யை, கிரிஷ் சோடங்கர் உள்ளிட்ட காங்கிரஸ் நிர்வாகிகள் சந்தித்து பேச்சுவார்த்தை நடத்தினர். அப்போது, காங்கிரஸ் எம்.எல்.ஏ.க்கள் 5 பேரின் ஆதரவு கடிதமும் விஜய்யிடம் வழங்கப்பட்டது.

இதன்படி, தவெக அமைச்சரவையில் காங்கிரஸுக்கு ஒரு இடம் வழங்கப்பட்டால், தமிழ்நாட்டில் முதல்முறையாக கூட்டணி ஆட்சி உருவாகும் வரலாறு படைக்கப்படும். சுமார் 60 ஆண்டுகளுக்குப் பிறகு தமிழக அமைச்சரவையில் காங்கிரஸ் இடம்பெறும் சூழலும் உருவாகியுள்ளது.

தற்போது தமிழக வெற்றிக் கழகம் 108 இடங்களில் வெற்றி பெற்றுள்ள நிலையில், பெரும்பான்மைக்கு 118 இடங்கள் தேவைப்படுகிறது. இதனால் விடுதலை சிறுத்தைகள் கட்சி மற்றும் இந்திய கம்யூனிஸ்ட் கட்சி உள்ளிட்ட கட்சிகளும் தவெகவுக்கு ஆதரவு அளிக்கலாம் என அரசியல் வட்டாரங்களில் எதிர்பார்க்கப்படுகிறது.