தமிழகத்தில் நிலவி வரும் பரபரப்பான அரசியல் சூழ்நிலைக்கிடையே, மாநிலத்தின் முக்கிய பகுதிகளில் பாதுகாப்பை அதிகரிக்க வேண்டும் என்று மத்திய உளவுத்துறை தமிழக காவல்துறைக்கு எச்சரிக்கை விடுத்துள்ளதாக தகவல்கள் வெளியாகியுள்ளன.
நடந்து முடிந்த 2026 தமிழக சட்டப்பேரவைத் தேர்தலில் விஜய் தலைமையிலான தமிழக வெற்றிக் கழகம் (தவெக) 108 இடங்களில் வெற்றி பெற்று தனிப்பெரும் கட்சியாக உருவெடுத்துள்ளது. இருப்பினும், ஆட்சி அமைக்க தேவையான 118 இடங்களைக் கொண்ட முழு பெரும்பான்மையைப் பெற முடியாத நிலை ஏற்பட்டுள்ளது.
எந்தக் கட்சிக்கும் தனிப்பெரும்பான்மை கிடைக்காததால், தமிழகத்தில் முதல்முறையாக தொங்கு பேரவை உருவாகும் சூழல் ஏற்பட்டுள்ளது. இதனால் கூட்டணி ஆட்சியை அமைப்பதற்கான முயற்சிகளில் தமிழக வெற்றிக் கழகம் தீவிரம் காட்டி வருகிறது.
சுயேச்சை உறுப்பினர்கள் யாரும் இல்லாத நிலையில், விஜய் தற்போது திராவிட முன்னேற்றக் கழகம் அல்லது அண்ணா திராவிட முன்னேற்றக் கழகம் கூட்டணியில் உள்ள கட்சிகளின் ஆதரவை எதிர்பார்த்து வருகிறார்.
1967 மற்றும் 1977 ஆம் ஆண்டுகளில் முறையே திமுக மற்றும் அதிமுக அரசியல் மாற்றத்தை உருவாக்கியதைப் போல, தற்போது விஜய் தலைமையிலான தவெகவும் தமிழக அரசியலில் புதிய மாற்றத்தை உருவாக்கியுள்ளது. ஆனால் எந்தக் கட்சிக்கும் தெளிவான பெரும்பான்மை இல்லாததால், அரசியல் நிச்சயமற்ற நிலை தொடர்கிறது.
இதனிடையே, ஆட்சி அமைக்க உரிமைகோரி விஜய் தமிழ்நாடு ஆளுநர் ரஜேந்திர விஷ்வநாத் அர்லேக்கர் அவர்களுக்கு கடிதம் அனுப்பியுள்ளார். அதனைத் தொடர்ந்து நடைபெற்ற சந்திப்பில், பெரும்பான்மை உறுப்பினர்களின் ஆதரவை உறுதிப்படுத்தும் வகையில் ஆதாரங்களை சமர்ப்பிக்க வேண்டும் என்று ஆளுநர் தெளிவுபடுத்தியதாக கூறப்படுகிறது.
இதனால், விஜய் முதல்வராக பதவியேற்பதில் சிக்கல் ஏற்பட்டுள்ளதாக அரசியல் வட்டாரங்களில் பேசப்படுகிறது. குறிப்பாக, இந்திய கம்யூனிஸ்ட் கட்சி, விடுதலை சிறுத்தைகள் கட்சி மற்றும் பட்டாளி மக்கள் கட்சி ஆகிய கட்சிகளின் ஆதரவை எதிர்பார்த்திருந்த நிலையில், இதுவரை உறுதியான ஆதரவு கிடைக்காததால் அரசியல் பரபரப்பு அதிகரித்துள்ளது.
இந்த சூழ்நிலையில், தமிழகத்தில் சட்டம்-ஒழுங்கு பிரச்னைகள் உருவாகும் வாய்ப்பு இருப்பதாக மத்திய உளவுத்துறை எச்சரிக்கை விடுத்துள்ளதாக தகவல்கள் தெரிவிக்கின்றன. இதனைத் தொடர்ந்து மாநிலத்தின் முக்கிய இடங்களில் பாதுகாப்பு ஏற்பாடுகள் தீவிரப்படுத்தப்பட்டுள்ளதாக கூறப்படுகிறது.
Dhiyanesh
