ஈரான் - அமெரிக்கா பதற்றம் எதிரொலி: பங்குச் சந்தை கடும் சரிவு

ஈரான் - அமெரிக்கா இடையே அதிகரித்து வரும் அரசியல் பதற்றம் மற்றும் கச்சா எண்ணெய் விலை உயர்வு காரணமாக இந்திய பங்குச் சந்தைகள் இன்றைய வர்த்தகத்தில் கடும் சரிவை சந்தித்தன.

இன்றைய வர்த்தகத்தில் இந்திய பங்குச் சந்தைகள் பலவீனமான தொடக்கத்தைக் கண்டன. தொடர்ந்து ஏற்பட்ட விற்பனை அழுத்தத்தால், நிஃப்டி குறியீடு 24,126.65 என்ற குறைந்தபட்ச நிலை வரை சரிந்தது.

இருப்பினும், தகவல் தொழில்நுட்பம், சுகாதாரம் மற்றும் நுகர்வோர் பொருட்கள் துறைகளில் முதலீட்டாளர்கள் வாங்குதல் அதிகரித்ததால் சந்தைகள் ஓரளவு மீண்டன.

வர்த்தக முடிவில், சென்செக்ஸ் 516.33 புள்ளிகள் சரிந்து 77,328.19 புள்ளிகளாகவும், நிஃப்டி 150.50 புள்ளிகள் சரிந்து 24,176.15 புள்ளிகளாகவும் நிலைபெற்றன.

இந்த வார அளவில் பார்க்கும்போது, சென்செக்ஸ் 0.5 சதவீதமும், நிஃப்டி 50 குறியீடு 0.7 சதவீதமும் உயர்வை பதிவு செய்துள்ளன.

சென்செக்ஸ் பட்டியலில் ஸ்டேட் பேங்க் ஆஃப் இந்தியா பங்குகள் மார்ச் காலாண்டு வருவாய் முடிவுகளுக்குப் பிறகு 6.62 சதவீதம் சரிந்தன.

அதேவேளையில், HDFC Bank, Bajaj Finance, Axis Bank, UltraTech Cement மற்றும் Mahindra & Mahindra உள்ளிட்ட பங்குகள் சரிவை சந்தித்தன.

மறுபுறம், Asian Paints, Adani Ports, Infosys மற்றும் HCLTech உள்ளிட்ட பங்குகள் உயர்வுடன் முடிந்தன.

துறைவாரியாக பார்க்கும்போது, தகவல் தொழில்நுட்பம், சுகாதாரம் மற்றும் எஃப்எம்சிஜி துறைகள் மட்டும் உயர்வைக் கண்டன. பொதுத்துறை வங்கிக் குறியீடு 3 சதவீதமும், எண்ணெய் மற்றும் எரிவாயு துறை 1 சதவீதமும் சரிந்தன.

தனியார் வங்கிகள், உலோகம், மின்சாரம், எரிசக்தி மற்றும் ரியல் எஸ்டேட் துறைகளும் சரிவில் முடிந்தன.

இதற்கிடையில், தெர்மாக்ஸ், ஃபினோலெக்ஸ் கேபிள்ஸ், நாட்கோ பார்மா, அதானி போர்ட்ஸ், லாரஸ் லேப்ஸ், பிஎச்இஎல் உள்ளிட்ட 210-க்கும் மேற்பட்ட பங்குகள் மும்பை பங்குச் சந்தையில் 52 வார உச்சத்தை எட்டின.

எதிர்பார்த்ததை விட குறைந்த வருவாய் முடிவுகளை வெளியிட்டதால் எஸ்பிஐ பங்குகள் 6.7 சதவீதம் சரிந்தன. அதேசமயம், வலுவான காலாண்டு முடிவுகளை வெளியிட்டதால் டாபர் இந்தியா, சொனாட்டா சாஃப்ட்வேர் மற்றும் தெர்மாக்ஸ் பங்குகள் உயர்வைப் பதிவு செய்தன.

ஆசிய சந்தைகளில் தென் கொரியாவின் கோஸ்பி உயர்வுடன் முடிந்த நிலையில், ஜப்பானின் நிக்கி 225, ஹாங்காங் ஹாங் செங் மற்றும் ஷாங்காய் எஸ்எஸ்இ காம்போசிட் குறியீடுகள் சரிவில் முடிந்தன.

வெளிநாட்டு நிறுவன முதலீட்டாளர்கள் ரூ.340.89 கோடி மதிப்பிலான பங்குகளை விற்பனை செய்துள்ளதாக தரவுகள் தெரிவிக்கின்றன.

சர்வதேச பிரென்ட் கச்சா எண்ணெய் விலை பேரலுக்கு சுமார் 100 அமெரிக்க டாலர் என்ற அளவில் வர்த்தகமானது.